Սեպտեմբերի 27-ից 30-ը, Հայաստանում կայացաւ Երրորդ միջագգային բուժքոյրական համագումարը, որի կարգախօսն էր՝ «Բուժքոյրութիւն, կրթութիւն միտւած բուժքոյրերի եւ հիւանդների անվտանգութեանը եւ բուժման արդիւնքներին»:

Բուժքոյրերը հանդիսանում են առողջութեան խնամքի իրականացման եւ որակի բարելաւման շարժիչ ուժը. բուժքոյրական առաջնորդութիւնը կոչւած է ղեկավարելու փոփոխութիւնները ուղղւած սպասարկման մէջ որակի բարելաւման, հիւանդի անվտանգութեան, կրթութեան եւ հետազօտութեան ոլորտներում: Ապացոյցների վրայ հիմնւած մասնագիտութիւնը պահանջում է աւելի մեծ ուշադրութիւն դարձնել լաւագոյն պրակտիկային, նորարարութեանը եւ հետազօտութիւններին: Բուժքոյրերը պէտք է ունենան անհրաժեշտ գիտելիքներ, հմտութիւններ, կարողութիւններ դիմակայելու առողջապահութեան համակարգում կատարւող փոփոխութիւններին եւ բաւարարելու խնամքի բարձր որակի պահանջները:

Համագումարի նպատակն էր կրթութեան միջոցով նպաստել հիւանդի բուժման արդիւնքների անվտանգութեանը եւ խնամքի որակի բարելաւմանը:

Համագումարի խնդիրներն էին՝

• Լուսարձակի տակ դնել բուժքոյրերի ներդրումը հիւանդների անվտանգութեան եւ առողջապահութեան ծառայութիւնների մէջ:
• Բարելաւել հիւանդների անվտանգութիւնը եւ քոյրական խնամքը, բուժման առաւել բարձր արդիւնքների միտումով:
• Ապահովել գլոբալ համագործակցութիւն առողջապահութեան առաջընթացի համար բուժքոյրական գիտութեան եւ կրթութեան միջոցով:

Այս համագումարին մեր համայնքից, Թեհրանի Հայոց Թեմի հովանաւորութեան ներքոյ, մասնակցեցին «Ա. Աւետիսեան» Ազգ. Բուժարանի տնօրէն՝ Մարիետ Թումեանցը եւ հայ բուժքոյրերի աշխատակազմը:

Համագումարին մասնակցում էին նաեւ՝ Ամերիկայից, Անգլիայից, Իտալիայից, Կորէայից Հոնկոնգից, Հարաւային Աֆրիկայից եւ այլ երկրների բարձրաստիճան բուժքոյրեր՝ իրենց դասախօսութիւններով:

«Ա. Աւետիսեան» Ազգ. Բուժարանի տնօրէն՝ Մարիետ Թումեանցի դասախօսութեան թեման էր «Բուժքոյրերի հզօրացումը աւելի լաւ առողջապահական արդիւնքների է յանգեցնում»:

Դասախօսութեան թեման մեծ ընդառաջում գտաւ բոլոր մասնագէտների եւ մասնակիցների կողմից: