Ս. Աստւածածնայ Վերափոխման տօնակատարութիւնների վերջին փուլը վերապահւած էր Սարի և Գորգանի մեր սիրելի զաւակներին:

Թւականիս հինգշաբթի և ուրբաթ օգոստոսի 17 և 18-ին, երկօրեայ ուխտագնացութիւն էր կազմակերպւած դէպի Սարի և Գորգան, Թ.Հ.Թ. Կրօնական Խորհրդի կողմից և համագործակցութեամբ եկեղեցիների եկեղեցական խորհրդների կազմից կեանքի կոչւած յատուկ ուխտագնացութեան յանձնախմբի:

Հինգշաբթի առաւօտեան Թեմիս Առաջնորդ՝ Գերշ. Տ. Սեպուհ Ս. Արք. Սարգսեանը, ընկերակցութեամբ Առաջնորդական Փոխանորդ՝ Գերշ. Տ. Մակար Ս. Եպս. Աշգարեանի և շրջանի այցելու հովիւ՝ Արժ. Տ. Արիստակէս քհն. Շահմիրեանի և թեմական խորհրդի ներկայացուցիչների, յանձինս Հարմիկ Աւետեանի, Արա Գալստեանի և Քրիստ Արզումանեանի ժամանեց Սարի և դիմաւորւեց տեղւոյն եկեղեցա-դպրոցական հոգաբարձութեան ատենապետ՝ Յովիկ Մարտիրոսեանի և նրա ընկերակիցների կողմից: Ապա նրա բնակարանում կարճ ժամանակ անցկացրելուց յետոյ ուղղւեց դէպի Արարատ սրահ, որտեղ հանդիպեց Սարիի հայ համայնքի զաւակների հետ: Ճաշի աւարտին Սրբազան Հայրը սրահի անմիջական կողքին գտնւող գերեզմանատնում յատուկ հոգեհանգստի աղօթք բարձրացրեց Սարիում ննջած հին թէ նոր բոլոր ննջեցեալների հոգիների հանգստի համար: Ապա սրահում պրն. Յովիկ Մարտիրոսեանը յանուն Սարիցիների բարի գալստեան խօսք արտայայտեց և իր խօսքում նաև յայտնեց որոշ մտահոգութիւններ, որոնց լուծման համար յոյս յայտնեց, որ Աստծով Սրբազան Հայրն ու Թեմականի ներկայացուցիչները դրանք հասցնեն առ որ անկէ:

Իր կարգին Առաջնորդ Սրբազան Հայրը մեծապէս գնահատեց ներկաների և Սարիցիների կատարած աշխատանքը և իր քաջալերական խօսքերով մխիթարեց, գօտեպնդեց ու քաջալերեց, որ շարունակեն իրենց ամենօրեայ «պայքարը» նոյն նախանձախնդրութեամբ և պատասխանատու գիտակցութեամբ: 

Միասնաբար, կէսօրւայ ճաշը կիսելուց յետոյ, համայնքի զաւակներից շատերը առանձնաբար մօտենալով Սրբազան Հօրը իրենց դժւարութիւնների ու տագնապների մասին զեկուցեցին և խնդրեցին նրա հայրական աղօթքն ու օրհնութիւնը:

Երեկոյեան Սրբազան Հայրն իր ընկերակիցներով հրաժեշտ տալով Սարիցիներին, ուղղւեց դէպի Գորգան և այնտեղ էլ դիմաւորւեց տեղւոյն եկեղեցա-դպրոցական հոգաբարձութեան անդամների կողմից: Կարճ հանդիպումից յետոյ, իջևանեցին պանդոկում: 

Թեհրանից եկող ուխտաւորների խումբն էլ արդէն ժամանել էր այնտեղ իրենց օրւայ ծրագրի աւարտին: Գիշերը տեղւոյն եկեղեցա-դպրոցական հոգաբարձութիւնը ընթրիքով պատւեց Սրբազան Հօրն ու իր ընկերակիցներին: 

Յաջորդ առաւօտ, ուրբաթ 18 օգոստոսի առաւօտեան Ղորողի Ս. Աստւածածին Մատրան մէջ ուխտաւորների ներկայութեամբ տեղի ունեցան Գիշերային և Առաւօտեան ժամերգութիւնները, որից յետոյ սկիզբ առաւ հանդիսաւոր Ս. պատարագի թափորը:

Պատարագը մատուցեց Թեմիս Առաջնորդ՝ Գերշ. Տ. Սեպուհ Ս. Արք. Սարգսեանը, որին խորանի վրայ սպասարկում էր Արժ. Տ. Արիստակէս քհն. Շահմիրեանը: Սրբազան Հայրն իր քարոզում անդրադառնալով Աստւածածնայ Վերափոխման խորհրդին ՝ վեր բերեց ու դրւադեց նրա մայրական տիպարն ու կոչումը և դրա միջից խօսեց սիրոյ և խաղաղութեան մասին, որոնք անհրաժեշտ սիւներն են հանդիսանում առողջ ընտանիքին, ընկերութեան և ողջ աշխարհին, որոնց պակասի և անտեսումի պատճառով տուժում և մեծապէս տառապում է այսօր ներկայ աշխարհն ու մարդկային ընկերութիւնը, յիշեցրեց Սրբազան Հայրը:

Պատարագի աւարտին եկեղեցու բակում կատարւեց աւանդական խաղողի օրհնութիւնը, որից յետոյ Գորգանի եկեղեցա-դպրոցական հոգաբարձութիւնը տեղւոյն սրահում կէսօրւայ ճաշով հիւրասիրեց թէ Սրբազան Հօրը և թէ հիւրերին: Ճաշի ընթացքին խօսք առաւ հոգաբարձութեան ատենապետ՝ Հայկազ Ցոլակեանը և յանուն ժողովրդին ու հոգաբարձութեան անդամներին բարի գալուստ մաղթեց և մատնանշելով ներկայ տիրող յատուկ մի քանի երևոյթներ, հրաւիրեց Առաջնորդ Սրբազան Հօրը, որ իր հայրական պատգամով խրախուսի և քաջալերի շրջանի ներկայ զաւակներին:

Սրբազան Հայրն էլ իր խօսքում պատմական փաստարկներով խօսեց համընդհանուր տիրող դժւարութիւնների մասին և յատկապէս մարդկանց առաւել չափով մտահոգող տեղաշարժների մասին: Նա պատճառների և հետևանքների մասին լուսաբանելով մատնանշեց կարևոր տւեալներ, որոնք կազմում են մեր ժողովրդի հոգեբարոյական և ազգային արժէքները և դրանց կառչւածութեան և պահպանման առումով կատարւած հսկայ և միաժամանակ գնահատելի աշխատանքներին և թափւած ճիգին, մասնաւորաբար շրջաններում կատարւած: Նա գնահատանքով և քաջալերանքով արտայայտւեց և թելադրեց, որ բոլորն էլ գործնականօրէն իրենց մասնակցութիւնը բերեն այդ սրբազան աշխատանքին և որքան հնարաւոր է սիրով, համերաշխութեամբ և համագործակցութեամբ կատարեն աշխատանքները, որպէսզի դրանք արդիւնաբեր լինեն և ծառայեն իրենց իսկ նպատակին:

Երեկոյեան, Սրբազան Հայրը հրաժեշտ տալով տեղւոյն հաւատացեալներին ու համայնքի զաւակներին վերադարձաւ Թեհրան:

Թ.Հ.Թ. Կրօնական Խորհուրդ

{gallery}201708/2017082001{/gallery}