Երեքշաբթի, 27 յունիս 2023 թւականի առաւօտեան, Թեհրանի հայոց թեմի ազգային առաջնորդարանի դահլիճում, Իրանի ռադիոհեռուստատեսութեան «PressTV»-ի հեռուստաալիքը եւ parstoday.ir/hy-ը (հայերէն ռադիոժամ) հարցազրոյցներ էին կազմակերպել Թեհրանի հայոց թեմի առաջնորդ Տ. Սեպուհ արք. Սարգսեանի հետ, Իսրայէլի՝ Պաղեստինի ժողովրդի եւ Երուսաղէմի հայկական համայնքի դէմ վերջին գործողութիւնների, Արցախի բռնագրաււած եւ Իրանի հետ սահմանամերձ տարածքներում Ադրբեջանի համագործակցութեամբ տեղակայման, եւ, ընդհանրապէս տարածաշրջանում սիոնիստական ռեժիմի սադրանքների վերաբերեալ:

Սրբազան Հայրը նախ համառօտ գծերով ներկայացրեց Երուսաղէմի հայկական համայնքի դարաւոր կարգավիճակը, եւ անդրադարձաւ Երուսաղէմում հայկական համայնքի ներկայ վիճակին: Սրբազան Հայրը նշեց. «Երբ Իսրայէլը սկսեց խտրականութեան քաղաքականութեամբ կալւածները գրաւել եւ քրիստոնեաների դէմ հալածանք իրականացնել, հայութիւնը սկսեց հեռանալ տեղից: Սակայն, այսօր, պատրիարքարանը եւ հայ համայնքը ամէն ինչ կատարում են, որպէսզի ամուր պահեն իրենց իրաւունքները, ինչքանով որ հնարաւոր է, ի վերջոյ համայնքը բռնատիրական իշխանութեան լուծի տակ է, եւ Իսրայէլը իր ուզածը կատարում է առանց որեւէ մէկին հաշիւ ներկայացնելու: Նա, Պաղեստինի իրաւազրկւած ժողովրդին իր բնակարաններից դուրս հանեց, ամբողջ աշխարհը այսօր ասում է, որ պաղեստինցիները պէտք է վերադառնան իրենց տները, բայց Իսրայէլը անտարբեր է: Մենք, որպէս եկեղեցի դատապարտում ենք հրէական կառավարութեան այս դիրքորոշումը ոչ միայն մեր ժողովրդի, այլեւ՝ պաղեստինցի ժողովրդի հանդէպ, որ իր իրաւունքներից ու իր հողերից զրկւած գաղթական վիճակի մէջ է»:

Սրբազան Հայրը անդրադառնալով Երուսաղէմի հայկական տարածքների հետ կապւած վերջին դէպքերին, այսպէս ասաց. «Երբ մի պետութիւն, իր քաղաքականութեամբ միջամտում է որեւէ համայնքի ներքին գործերին, այնտեղ անպայմանօրէն ե՛ւ խարդախութիւն, ե՛ւ կեղծիք, եւ նաեւ իրաւունքների բռնաբարում տեղի կունենայ: Այսօր Երուսաղէմի հայ համայնքը այդ դժւարութեան դիմաց է կանգնած»: Սրբազան Հայրը այդ մասին ընդգծեց. «Ի յայտ է գալիս, որ այդպէս չէ, ինչպէս որ լուրերը շրջանառւում են, թէ Նուրհան արք. Մանուկեան պատրիարքը այս կամ այն քայլին է գնացել: Պատրիարքը շատ խիստ է վերաբերւել այն միաբանների հետ, որոնք իրենց պաշտօնը շահագործելով փորձել են հողերը յատուկ գերծարքներով վաճառել եւ կարգալոյծ է արել նրանց: Հիմա, եթէ կարգալոյծ եղածը, առանց այդ որորշումները նկատի առնելու եւ յենւելով պետութեան ուժին աշխատանքներ է տանում, դրա մէջ ի՞նչ մեղք ունի Մանուկեան Սրբազանը»:

Անդրադառնալով Արցախի բռնագրաււած տարածքներում Ադրբեջանի հետ համագործացկութեամբ Իրանի սահմանամերձ շրջաններում սիոնիստական ուժերի տեղակայման մասին հնչած հարցին, Սրբազան Հայրն ընդգծեց. «Մեզ համար նորութիւն չէ Իսրայէլի կառավարութեան կայսերապաշտական ծաւալողական քաղաքականութիւնը եւ, հետեւաբար, այնտեղ, ուր ինքը իրեն համակարծիք պետութիւն եւ իշխանութիւն է գտնում, առիթը լաւագոյնս օգտագործում է մեր ժողովուրդի իրաւունքները ոտնահարելու համար: Բոլորս էլ գիտենք, աշխարհն էլ արդէն իմացաւ, որ Արցախը հայկական տարածք է, բայց այսօր, դժբախտաբար, ուժը իրենց կողքին է եւ Արցախը ջարդեցին: Արցախի 75 տոկոսը գրաււած է ադրբեջանցիների կողմից եւ այսօր Իսրայէլի պետութիւնը համագործակցաբար Ադրբեջանի կառավարութեան հետ ոչ միայն փորձում է ինքն այդ գրաւեալ տարածքների վրայ իր շահերը հետապնդելով աշխատանք տանել, այլ, նաեւ, փորձում է դժբախտաբար իրանեան տարածքներում իր ուզածը առաջ տանել: Բայց ես հաւատացած եմ, որ Իրանի ժողովուրդը եւ պետութիւնը կանդրադառնայ այդ դառը իրականութեանը եւ երբեք ընթացք չի տալու իսրայէլեան պետութեան այս արշաւանքին»: