Ուրբաթ, 4 օգոստոս 2023 թւականի կէսօրին, Թեմիս Առաջնորդ Գերշ. Տ. Սեպուհ Ս. Արք. Սարգսեանի ընկերակցութեամբ՝ Թեմական խորհրդի ատենապետ ճրտպ. Նորայր Արամեանը եւ «Ալիք» հաստատութեան ներկայացուցիչ՝ պրն. Սեւան Դանիէլեանը այցելել են ՀՀ-ում ԻԻՀ դեսպանութիւն եւ հանդիպում են ունեցել Ի. Իսլ. Հանրապետութեան արտակարգ եւ լիազօր դեսպան Մեհդի Սոբհանիի հետ:

Պրն. Դեսպանը ջերմօրէն ողջունել եւ բարի գալուստ է մաղթել հիւրերին: Հանդիպման ընթացքին կարեւորութեամբ խօսւել է հայ-իրանական եւ երկու ժողովուրդների վաղեմի սերտ ու բարեկամական յարաբերութիւնների մասին մասնաւորելով յատկապէս մշակութային յարաբերութիւնները եւ հայութեան բերած ներդրումը, ընդհանրապէս իրանեան արւեստին:

Հանդիպմանը անդրադարձ է եղել Ադրբեջանի կողմից Արցախի խաղաղ բնակչութեան դէմ թշնամական գործողութիւններին եւ աւելի քան 8 ամիս շուրջ 120 հազար բնակչութեան շրջափակմանը նաեւ տարածաշրջանային իրադարձութիւններին, որտեղ շեշտւել է կարեւորութիւնը Իրանի դերակատարութեան, որն իր հզօրութեամբ եւ ինչու չէ նաեւ քաղաքակրթական բարձր մակարդակով կարող է մեծ դեր ունենալ տարածաշրջանի խաղաղութեան կառուցողական գործում:

Դեսպանը նաեւ իր կարգին ընդգծել է Իրան-Հայաստան յարաբերութիւնների եւ երկուստէք համագործակցութեան կարեւորութիւնն ու այս ուղղութեամբ համատեղ ջանքեր գործադրելու անհրաժեշտութիւնը:

Աւելի քան մէկ ժամ տեւող հանդիպումը անցել է շատ մտերմիկ եւ անկեղծ մթնոլորտում:

Ազգային Առաջնորդարանի Հանրային կապ