Ի հետեւումն «Ալիք» օրաթերթի 7 նոյեմբեր 2023 թւակիր համարի՝ Հեռախօս «Ալիքին» բաժնում արտացոլւած գրութեան, անհրաժեշտ ենք համարում համապարփակ ներկայացնել տարեկան ուսումնավճարների յաւելման վերաբերեալ որոշումների կայացման գործընթացը։

Նախ, որպէս նախաբան հարկ է անդրադառնալ այն իրողութեան, որ հնարաւոր չէ հայկական դպրոցները՝ ուսումնավճարների ցածր գումարի ակնկալիքով սահմանել պետական դպրոցների շարքին, քանի որ հայկական դպրոցներին անհրաժեշտ է տրամադրել նաեւ հայ փոխտեսուչներ եւ հայերէն առարկաների ու կրօնի դասաւանդման ուսուցչական կազմ, որոնք հայ աշակերտին կսերմանեն՝ Հայկականութիւնը եւ Հայեցի դաստիարակութիւնը: Ուստի հարկ է նկատի ունենալ, որ հայկական դպրոցների եւ ընդհանրապէս ազգային կառոյցների գոյատեւման գրաւականն է՝ ազգային իշխանութեան եւ համայնքում ապրող իւրաքանչիւր անձի ներդրումն ու մասնակցութիւնը:

Այս տեսլականով, հարկ է անդրադառնալ վերջին տարիներին տարբեր պատճառներով երկրում առաջացած տնտեսական ճգնաժամին ու աշխատավարձերի բարձր տոկոսային բարձրացմանը եւ ի դիմաց Ազգ. Առաջնորդարանի սպասարկութիւնների գանձւելիք սակագների եւ տարեկան ուսումնավճարների ցածր տոկոսային յաւելման քաղաքականութեանը, որը հիմնականում կիրառւել է համայնքի տնտեսական ծանր պայմանները նկատի ունենալով, ինչը առաջացրել է ելեւմուտքի անհամապատասխան պատկեր եւ պատճառ է հանդիսացել բարձր նիւթական բացերի:

Վերոնշեալ բոլոր գործօններին պէտք է յաւելել նաեւ տարիների ընթացքում համայնքում աշխատող հայկական դպրոցների աշակերտութեան թւի զգալի նւազումը եւ դպրոցների թւի անփոփոխ մնալու պարագան: Այս ուղղութեամբ հարկ է նշել այն իրողութեան, որ որոշ դպրոցներում դասարանների թիւը կազմում է 10-ից ցածր, որը ոչ մի ստանդարդի ու չափանիշի հետ չի համապատասխանում եւ որն ինքնին նիւթական իրավիճակի բարդացման պատճառ է հանդիսանում:

Ըստ տւեալների, ներկայիս Թեհրանում աշխատում են ընդհանուր թւով 13 դպրոց եւ 4 մանկապարտէզ, որոնցից 4 դպրոցը եւ 1 մանկապարտէզը՝ միութենական եւ յարանւանական են: Իսկ 2023-2024 ուսումնական տարեշրջանի ընդհանուր աշակերտութեան թիւը՝ մանկապարտէզ եւ նախակրթարանի սաները ներառեալ կազմում է՝ 1639 աշակերտ-ուհի, որը ժամանակին կազմում էր համայնքիս 2-3 դպրոցի թիւը:

Անդրադառնալով դպրոցների տարեկան ուսումնավճարների յաւելման վերաբերեալ որոշումների կայացման գործընթացին պէտք է յայտնել, որ 2023-2024 ուսումնական տարեշրջանի ուսումնավճարների ուղղութեամբ, Կրթական խորհրդի կողմից մանրազնին ուսումնասիրւել, կազմւել եւ ներկայացւել են ուսումնավճարների համեմատական աղիւսակները, նաեւ տոկոսային յաւելման առաջարկութեան տարբերակներն ու Թեմական խորհրդի սուբսիդաւորման տոկոսային պատկերները, որոնք բազմիցս քննարկւել եւ տրամաբանօրէն յստակեցւել է 60%-ով աւելացումը՝ մանկապարտէզ-նախակրթարանների եւ դպրոցների ընդհանուր օղակների համար, որով Թեմական խորհրդի սուբսիդաւորումը կազմում է՝ 95.-միլիարդ ռիալի սահմաններում: Այս ուղղութեամբ հարկ է նշել, որ 100% յաւելում նկատի ունենալու դէպքում անգամ՝ 59.-միլիարդ ռիալի սահմաններում կը կազմի Թեմական խորհրդի սուբսիդաւորումը:

Յատկանշական է, որ վերոնշեալ բացատրութիւնները իրական այն պատկերն է, որը ներկայացւում է առ ի լուսաբանութիւն, սակայն աւելի մանրամասն բացատրութիւնները՝ նիւթական յստակ տւեալներով, կը ներկայացւի Կրթական խորհրդի իւրաքանչիւր դպրոցի ծնողների հետ կայացւող հանդիպումներում, որոնք նախատեսւել են իրականացնել յառաջիկայ քանի շաբաթների ընթացքում:

Իսկ դժւարութիւնները մեղմացնելու հնարաւոր եւ իրապաշտ ելքերին անդրադառնալով հարկ է ընդգծել դպրոցների եւ մանկապարտէզների վերադասաւորման օրակարգի կարեւորութիւնը, ինչը այս օրերին հրամայական եւ անխուսափելի օրակարգ է, որի նպատակն է ոչ միայն ծախսերի նւազումը, այլ նաեւ այն, որ հնարաւոր կը դառնայ կենտրոնացած համակարգում աւելի լաւ հնարաւորութիւններ տրամադրել եւ երաշխաւորել դպրոցների կրթութեան մակարդակն ու որակի բարձրացումը, որն իր կարեւորութեամբ միշտ առաջնահերթ է համարւել:

Ուստի հարկ է թաղային բոլոր զգայնութիւններից հեռու, համախոհ եւ աչալուրջ, ջանք տանել դպրոցների եւ մանկապարտէզների վերադասաւորման հարցն օր առաջ ընթացքի մէջ դնելու եւ իրականացնելու համար, քանի որ այդ ուղղութեամբ առկայ է նաեւ նախատեսւած եւ ուսումնասիրւած ծրագիրը, որով հնարաւոր կը լինի առաջնորդւել:

Քաջգիտակցելով ծնողների դիմագրաւած նիւթական դժւարութիւնները, որոնք ազդում են ուսումնավճար վճարելու կարողութեան վրայ հարկ ենք համարում նշել, որ հայկական դպրոց յաճախող ոչ մի աշակերտ ուսումնավճար չվճարելով, չի զրկւել եւ չի զրկւելու հայկական օջախում ուսում ստանալուց, սակայն մեր սպասումն է, որ իրապաշտ մօտեցում ունենալ՝ ուսումնավճարների սահմանւած գումարին եւ ինչպէս միշտ համագործակցել բարդութիւնները եւ դժւարութիւնները մեղմացնելու կապակցութեամբ:

Թ.Հ.Թ. ԹԵՄԱԿԱՆ ԽՈՐՀՈՒՐԴ
13.11.2023