Երեքշաբթի, 11 յուլիս 2023 թւականին, Թեմիս Առաջնորդ գերշ. Տ. Սեպուհ Ս. Արք. Սարգսեանը իր գրասենեակում ընդունեց Իսլ. Մշակոյթի եւ Առաջնորդութեան նախարարութեան Կրօնական փոքրամասնութիւնների մշակութային աշխատանքների բաժնի տնօրէն պրն. Ալիփուրին, կրօնական փոքրամասնութիւնների հարցերով զբաղւող գրասենեակի պատասխանատու եւ փորձագէտ օր. Մոբարհանին եւ նրանց ընկերակցող պրն. Իւսէֆիին:

Հանդիպմանը ներկայ էր նաեւ Ի. Իսլ. Խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը եւ Ազգ. Առաջնորդարանի դիւանապետ՝ Զօրիկ Կարապետեանը:

Հանդիպման ընթացքին խորհրդակցութիւն եղաւ եւ համադրութիւններ կատարւեց «Կրօնական հաւատքի դերակատարութիւնը միաստւածային կրօնների եւ հասարակութեան դաստիարակութեան մէջ» խորագրով խորհրդաժողովի կազմակերպման կապակցութեամբ, որը կայանալու է չորեքշաբթի, թւականիս յուլիսի 19-ին, Ազգ. Առաջնորդարանի դահլիճում:

Սրբազան Հայրը ջերմօրէն ողջունեց եւ յաջողութիւն մաղթեց յարգոյ հիւրերին: Նա նաեւ անդրադարձաւ վերջին օրերի ընթացքին սոցիալական ցանցերում տարածւած այն հոգեւորականի խօսքին, որ ասել էր՝ Քրիստոնեաներից պէտք է հեռու մնալ:

Ազգային Առաջնորդարանի Հանրային կապ