Թւականիս, Շաբաթ, մայիսի 7-ի առաւօտեան ժամը 11:00-ին, ազգային առաջնորդարանի դահլիճում, Առաջնորդական Փոխանորդ՝ Գերշ. Տ. Մակար Ս. Եպս. Աշգարեանը հիւրընկալեց Ֆրանսիայի Հայ Բժիշկների Միութեան ներկայացուցիչներից Թեհրան ժամանած շուրջ 30 բժիշկներ:

Սրբազան Հայրը իր բարի գալստեան խօսքից յետոյ ամփոփ գծերի մէջ ներկայացրեց Իրանում քրիստոնեաների եւ ի մասնաւորի իրանահայ համայնքի ու հայ եկեղեցու պատմութեան եւ դերակատարութեան մասին: Նա իր բացատրութեան ընթացքում նաեւ անդրադարձաւ Թեհրանի համայնքի ընդհանուր կազմւածքի ու կառուցւածքի մասին, ընդհանուր ծանօթացման համար խօսեց տեղւոյն եկեղեցիների, ժողովների, խորհուրդների, կազմակերպութիւնների, հաստատութիւնների, դպրոցների ու միութիւնների մասին եւ անդրադարձաւ նաեւ գաղութի կազմակերպւածութեան մասին:

Ապա այցելուները բազմակողմանի հարցեր ուղղեցին, որոնց բոլորին էլ պատասխանեց  Սրբազան Հայրը: Հիւրընկալման ներկայ էր նաեւ Առաջնորդարանի դիւանապետ՝ Պրն. Սերոժ Օհանեանը:

Համեստ հիւրասիրութիւնից յետոյ, խումբն այցելեց եկեղեցու շրջափակում գտնւող Մեծ Եղեռնի Յուշարձանը եւ ապա Ս. Սարգիս եկեղեցի, որտեղ Սրբազան Հօր գլխաւորութեամբ Տէրունական աղօթքն արտասանելուց յետոյ հիւրերը գոհունակ սրտով եւ ուրախութեամբ հրաժեշտ տալով մեկնեցին:

{gallery}201605/2016050802{/gallery}