Ալիք - Երեքշաբթի, դեկտեմբերի 13-ի երեկոյեան, ազգային առաջնորդարանի դահլիճում կայացաւ 16-րդ շրջանի նորընտիր Պատգամաւորական ժողովի անդրանիկ նիստը, նախագահութեամբ Թ. Հ. թեմի առաջնորդ Տ. Սեպուհ արք. Սարգսեանի:

Սկզբում նորընտիր ժողովին իր օրհնութեան խօսքն ուղղեց թեմակալ առաջնորդը:

Ապա ընտրւեց ժամանակաւոր տարիքային դիւանը՝ Նիկոլ Մուսախանեանը եւ Շապին Աբրահամեանը ու հրաւիրւեց Կենտրոնական ընտրական յանձնախմբի ատենապետ Համլետ Խալոյեանը, ով համապարփակ զեկոյց ներկայացրեց յանձնախմբի աշխատանքների եւ ընտրակարգի մասին:

Այնուհետեւ պատգամաւորներին յանձնւեց իրենց մանդատները եւ տեղի ունեցաւ 16-րդ շրջանի Պատգամաւորական ժողովի մնայուն դիւանի ընտրութիւնը: Պատգամաւորների մեծամասնութեան քւէով որոշւեց դիւանի ընտրութիւնն անցկացնել բաց քւէարկութեամբ, որի արդիւնքում ատենապետներ ընտրւեցին՝ Ժոզէֆ Մեհրաբեանն ու Վահիկ Աղաքեանը, իսկ ատենադպիրներ՝ Արմէն Հայրապետեանն ու Յարութ Նազարեանը: Ապա ժողովը զբաղւեց 15-րդ Պ.Ժ.-ում կեանքի կոչւած չորս յանձնախմբերի՝ բիւջետային ու տնտեսական, կրթական, հասարակական եւ կազմակերպչական գործունէութեամբ եւ պատգամաւորները ըստ իրենց ցանկութեան՝ գրանցւեցին յանձնախմբերում:

Նշենք, որ նիստի աւարտին, Վեհափառ Հայրապետը եւ ընկերակցող պատւիրակութիւնը հանդիպում ունեցան Թ.Հ.Թ. 16-րդ շրջանի նորընտիր Պատգամաւորական ժողովի, Թ.Հ.Թ. Թեմական խորհրդի, Կրօնական խորհրդի եւ Հաշւեքննիչ մարմնի անդամների հետ: